Ftit ġranet oħra se ssir ir-Regatta Nazzjonali ta’ Jum il-Vitorja, eżattament fit-8 ta’ Settembru fil-Port il-Kbir. Il-klabbs li se jipparteċipaw huma dawk ta’ Bormla, l-Isla, il-Birgu, il-Kalkara, il-Marsa, Valletta Marsamxett u s-Siġġiewi. Bħalissa, it-taħriġ u l-preparamenti għaddejjin ġmielhom u diversi dilettanti qegħdin jimlew il-Ponta tal-Isla u anka l-Belt. Hawnhekk, huma jsegwu t-taħriġ sabiex iżommu l-ħinijiet u jkollhom stampa aħjar ta’ min huma l-favoriti.
Matul din il-ġimgħa, aħna morna sal-Ponta tal-Isla u ntfajna mad-dilettanti li bdew isegwu b’tant attenzjoni. Kien hemm min kien armat bit-tromba, oħrajn bl-istopwatch u min lest biex jiġbed video bil-mobile sabiex jirraporta l-ħin lill-klabb .
Aħna ltqajna mad-dilettanti li bdew iżommu l-ħinjiet u għalhekk se nagħtu ħarsa ħafifa lejn il-favoriti tal-kategorija Open skont dak li qalulna:
Tal-Midalji
Id-distrett ta’ Bormla għamel tibdiliet kbar f’din it-tiġrija u wara ħafna snin, f’din il-kategorija se jerġgħu jaqdfu l-leġġendi Dennis Thornton u Clive Casha magħrufa bħala Tal-Fjuri. Għalhekk, wara t-tiġrija ta’ Marzu, ħafna qegħdin jaħsbu li l-favoriti se jkunu d-distretti tal-Birgu u Bormla u warajhom ikun hemm l-Isla. Wieħed ma jridx jinsa lill-opra tal-Marsa li għal din il-kategorija tinsab armata sew ukoll u qed ikollha ħinijiet tajba.
Tal-Frejgatina
Għal din it-tiġrija, il-favoriti huma d-distrett tal-Isla segwiti minn dawk tal-Marsa. Kemm il-Birgu kif ukoll Bormla u l-Kalkara għamlu tibdil għal din il-kategorija u mistennija taqtigħa bilanċjata għall-palju tat-tielet post.
Ta bi’2
Il-kru leġġendarju ta’ Bormla mistenni jirbaħ din it-tiġrija, però, wieħed irid joqgħod attent mill-kru tal-Birgu li skont id-dilettanti, din id-darba, kapaċi joffru sfida tajba. Għat-tielet post mistenni jkun hemm taqtigħa bejn l-Isla u Marsamxett.
Kajjik
Jidher li din it-tiġrija se tkun l-aktar waħda bilanċjata fejn ir-rebbieħa ta’ Marzu li għadda, l-Isla, jibdew bħala l-favoriti, madankollu, mistennija sfida kbira mill-kruwijiet ta’ Bormla u l-Birgu li fl-aħħar edizzjoni ddominaw din il-kategorija. Wieħed irid joqgħod attent anka għall-Kalkara u l-Marsa.
Ta’ B4
Ħafna qegħdin jaħsbu li din se tkun it-tiġrija li se tiddeċiedi kollox. Bħalissa hemm tliet distretti li qegħdin jagħmlu l-istess ħinijet: il-Birgu, Bormla u l-Isla, b’dawn tal-aħħar qegħdin daqsxejn aħjar. Wieħed irid iżomm għajnejh fuq il-kru l-ġdid ta’ Marsamxett li jistgħu jidħlu u jerbħu l-palju faċilment.
Fuq kollox, mistennija Regatta bilanċjata bil-favoriti l-Isla, Bormla u l-Birgu. Bla dubju, nhar it-8 ta’ Settembru, il-Port il-Kbir se jkun imsebbaħ bil-kuluri tipiċi ta’ dawn id-distretti u mżewwaq bil-briju li jafu jagħmlu dawn il-partitarji.
Ftit ġranet oħra se ssir ir-Regatta Nazzjonali ta’ Jum il-Vitorja, eżattament fit-8 ta’ Settembru fil-Port il-Kbir. Il-klabbs li se jipparteċipaw huma dawk ta’ Bormla, l-Isla, il-Birgu, il-Kalkara, il-Marsa, Valletta Marsamxett u s-Siġġiewi. Bħalissa, it-taħriġ u l-preparamenti għaddejjin ġmielhom u diversi dilettanti qegħdin jimlew il-Ponta tal-Isla u anka l-Belt. Hawnhekk, huma jsegwu t-taħriġ sabiex iżommu l-ħinijiet u jkollhom stampa aħjar ta’ min huma l-favoriti.
Matul din il-ġimgħa, aħna morna sal-Ponta tal-Isla u ntfajna mad-dilettanti li bdew isegwu b’tant attenzjoni. Kien hemm min kien armat bit-tromba, oħrajn bl-istopwatch u min lest biex jiġbed video bil-mobile sabiex jirraporta l-ħin lill-klabb .
Aħna ltqajna mad-dilettanti li bdew iżommu l-ħinjiet u għalhekk se nagħtu ħarsa ħafifa lejn il-favoriti tal-kategorija Open skont dak li qalulna:
Tal-Midalji
Id-distrett ta’ Bormla għamel tibdiliet kbar f’din it-tiġrija u wara ħafna snin, f’din il-kategorija se jerġgħu jaqdfu l-leġġendi Dennis Thornton u Clive Casha magħrufa bħala Tal-Fjuri. Għalhekk, wara t-tiġrija ta’ Marzu, ħafna qegħdin jaħsbu li l-favoriti se jkunu d-distretti tal-Birgu u Bormla u warajhom ikun hemm l-Isla. Wieħed ma jridx jinsa lill-opra tal-Marsa li għal din il-kategorija tinsab armata sew ukoll u qed ikollha ħinijiet tajba.
Tal-Frejgatina
Għal din it-tiġrija, il-favoriti huma d-distrett tal-Isla segwiti minn dawk tal-Marsa. Kemm il-Birgu kif ukoll Bormla u l-Kalkara għamlu tibdil għal din il-kategorija u mistennija taqtigħa bilanċjata għall-palju tat-tielet post.
Ta bi’2
Il-kru leġġendarju ta’ Bormla mistenni jirbaħ din it-tiġrija, però, wieħed irid joqgħod attent mill-kru tal-Birgu li skont id-dilettanti, din id-darba, kapaċi joffru sfida tajba. Għat-tielet post mistenni jkun hemm taqtigħa bejn l-Isla u Marsamxett.
Kajjik
Jidher li din it-tiġrija se tkun l-aktar waħda bilanċjata fejn ir-rebbieħa ta’ Marzu li għadda, l-Isla, jibdew bħala l-favoriti, madankollu, mistennija sfida kbira mill-kruwijiet ta’ Bormla u l-Birgu li fl-aħħar edizzjoni ddominaw din il-kategorija. Wieħed irid joqgħod attent anka għall-Kalkara u l-Marsa.
Ta’ B4
Ħafna qegħdin jaħsbu li din se tkun it-tiġrija li se tiddeċiedi kollox. Bħalissa hemm tliet distretti li qegħdin jagħmlu l-istess ħinijet: il-Birgu, Bormla u l-Isla, b’dawn tal-aħħar qegħdin daqsxejn aħjar. Wieħed irid iżomm għajnejh fuq il-kru l-ġdid ta’ Marsamxett li jistgħu jidħlu u jerbħu l-palju faċilment.
Fuq kollox, mistennija Regatta bilanċjata bil-favoriti l-Isla, Bormla u l-Birgu. Bla dubju, nhar it-8 ta’ Settembru, il-Port il-Kbir se jkun imsebbaħ bil-kuluri tipiċi ta’ dawn id-distretti u mżewwaq bil-briju li jafu jagħmlu dawn il-partitarji.